Светлый путь

Поиск по сайту

Котькыӵе уж вормымон
Автор: Administrator   
24.05.2011 11:39

Ужазы азьмынӥсьёсты пӧртэм сямен данъяло. Но малы ке вань сюлмо тыршисьёс со радэ уг шедё, палэнэ кылё. Ёросысь «Удмурт кенеше» пыремъёс одӥгаз пумиськоназы та ужпумез ӝутӥзы но «Вакытэз» дасясьёслы вазиськизы: оло газетлэн бамаз соос сярысь гожъяно. Соку ик адямиоссэс ӵектӥзы. Дэмланзэс умоен лыдъяса, уж борды басьтӥськимы. Озьы Чутырысь скал фермае потӥмы. Ӵапак со нуналэ утчано адямимы, скал кыскись Р.М. Олина, дежурить каре вылэм. Шутэтскон интыязы вераськонмы пуромиз. Римма школаын умой дышетскиз. Котьма борды чупыр-чупыр басьтӥськылӥз. Анаез выжые мынӥз, шӧдске. Вазен дыръёсы ӵыжы-выжыез пӧлысь гуртысь гуртэ тулуп вурыса ветлӥсьёс но вал. Озьы куатетӥ классысен ик Римма ас понназ дэрем вуриз ни. Анай-атайтэк вазь кылеменыз сэрен, школа бере дышетсконзэ азинтыны ӧз быгаты. Кузпал но шедьтӥз ачиз кадь ик ужез яратӥсьсэ. Нырысь улӥзы-вылӥзы Сепожын. Николай Михайлович гурт удысын тыршиз. Со дыре уждунэн туж секыт вал. Егит анай вуриськон машинаез борды пуксиз. Кролик, ондатра но мукет куосысь дӥсь вурыны кутскиз. Пиналъёслы пальтоос, курткаос магазинысь басьтон сярысь сюлмаськонэз ик ӧй вал. Быгатэмзэ синйылтӥзы гуртоос но. Сандыкысьтызы поттӥзы басмаоссэс но Римма Михайловна доры куронэн вуылӥзы. Со басмаосысь быгатӥсь киос пиосмурт дэремъёс, юбкаос, брюкиос но мукет дӥсь пӧрмытъязы. Ужамез понна дун кылем-мылем басмаен басьтылӥз. Гуртоосын одӥг колхозын ужало, уждун ласянь югдур секыт шуыса, солы тодмо. Нош умой вуриськисьлэн, пе, басма юдэсэз гинэ но выль дӥськут вуронэ кутӥськыны кулэ. Оло школае мынытозь ик пиоссы анайзылэн шунытэнызы пыӵам дӥсьёсын ветлӥзы. Римма Михайловна тэк пуконэз уг тоды. Ялан малы ке но дышетске. Озьы егитысен ик черсонэз ӝог валаз. Олинъёс ӝоген Чутырысь хозяйствое вуизы. Римма Михайловна фермае ужаны кариськиз, нош Николай Михайлович котьку сямен тракторлэн, комбайнлэн рульзы сьӧры пуксиз. Выль интыязы ӝог дышизы. Чупырес муртлы котьма тунсыко. Сыӵеосын котырысьтыз калыклы но улыны тунсыкогес луэ. Кызьы ке 1 апреле ӵош ужась эшъёссэ серекъятэм ке серекъятэм ни. Пӧртэм мугоръёс борды соослэсь фотооссэс лякыса стенгазет лэсьтэм. Кӧня гориллям! Тӥни сыӵе со аспӧртэм нылкышно. - Сяськаос будэтонын но со милям бурдъясьмы. «Висьытӥз» ни милемыз соосын, - верало скал кыскисьёс. Сяська мертто ферма котыразы, шутэтскон сэрегзэс но шулдыр возё. - Одӥг сортэз вӧлмытыса, мукетыз борды басьтӥськем потэ, - вера Р.М. Олина. – Куке гераньёсын тунсыкъяськи, кидысысь гинэ но мерттӥсько вал. Берло выжи глоксиния вылэ. Шумпоттыто трос пумо хризантемаосы но. Али георгинъёсты люкасько. Кемалась ӧвӧл цыган сорт шедьтӥ. Сяськаез сьӧд тусъем. Таӵе тусо-буё маке мукетъёсызлэсь уката аспӧртэм адӟиське. Картэ соин но, таин но выремме умоен лыдъя. Ма, Зурае сяська понна но ачиз ик нуллӥз. Нылкышно трос пумо сяськаосын кузёяське. Маин паймытод на кадь. Озьы ке но, кузпалыз Риммаезлы вордӥськем нуналаз сяська керттэт сюлэмызъя кузьманы быгатэ. Сюро пудо-животъёсты нылкышно кызь тямыс ар ӵоже утялтэ ни. Колхоз ужез бырйизы пиосыз но. Бадӟымез Михаил пиез «Чутырский» СПК-ын механизаторын тырше. Сое кылем арын Удмуртилэн Президентэз дорын сӥлы каризы. Нош пичиез Лев - агроном. Таиз но быгатонъёссэ возьматӥз. Шаерысьтымы агрономъёс пӧлын ӵошатскыса, кыкетӥ интые потӥз, сӥзьыл Россиын ортчонояз пыриськоно луоз. Вормон тыныд, егит специалист! Кензы гинэ но гурт удысын тырше: агроном. Олинъёс чупыр-чупыр ужасесь шӧдтэк шорысь ӧвӧл, вылды. Выжызыя озьы кошке ни. Корка кузёлэн братэз Кировской областьысь одӥгез азьмынӥсь механизатор луэ. Бере уг кыльы Николай Михайлович но. Солэн усто ужамез одӥгаз республиканской «Герберын» пусъемын вал. Умой сям но ог-огед доры паласькыса сямен выже вылэм. Туэ Римма Михайловна ёросамы скал кыскисьёс пӧлын ортчем «Подружка Бурёнки» ӵошатсконэ пыриськиз. Калыке потамез юнме ӧз луы. Чутыръёсты нырысетӥ интыен шумпоттытӥз. - Та ужрадэ пыриськыны ӵош ужасьёсы ик бурдъязы, асьсэос ик юрттӥзы. Трос котырам бергазы Чутырь клубын ужасьёс, - тодаз вайыса маде Р.М. Олина. Ӵошатсконысен уженызы герӟаськем юанъёслы чик могатэк валэктонъёс сётъяз. Нош куке дыр вуиз возьматыны ваньмон дыръя маин вырем-турскемзэс, соку ик со «яркыт кизилиен» ворекъяны кутскиз. Кӧня пумо платьяос, кофтаос, мукет вурем-керттэм дӥськут жюри, учкись азе поттэмын вал! Синмаськод чеберезлы, паймод трос лыдызлы. Олинъёслэн семьяязы будӥсь котькуд поколенилы арлыдооссылэн быгатэмъёссылы дышыны мед кылдоз. Угось ки мынэ ке котьма лэсьтыны, улыны но шулдыргес.

Н. Данилова

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

P1030115.jpg

Вакыт (Приложение на удмуртском языке)