Светлый путь

Поиск по сайту

Шудон лэсьтӥзы, выжыосмы сярысь тодӥзы
Автор: Administrator   
28.04.2011 06:48

 Кылем толэзе Калык творчествоя юртын ужаз шаерамы тодмо луись кибашлыослэн Степановъёслэн «Улон бугор» выставказы. Отын тодматскыны луиз сюйысь лэсьтэм удмурт шудонъёсын, шуланъёсын, крезьгуро инструментъёсын, кортысь эмален шобыртэм чеберъянъёсын-утисьёсын. Туала вакытамы сюй мунёез вуттӥз Анатолий Петрович Степанов. Удмурт кун университетын дышетскыкуз ик йыраз малпан лыктӥз выжыосмылэсь сюен ужанзэс улӟытыны. Солэн кивалтэмез улсын 1991-тӥ арын Ижысь 41 номеро лицейын кылдытэмын вал творческой мастерской. Татын дышетскисьёс но Удмурт кун университетысь искусствоосъя факультетысь студентъёс тыршизы шедьтыны, улӟытыны но вӧлмытыны сюй шудон лэсьтон вашкала удмурт амалъёсты. Отӥяз Анатолий Петрович борды итӥськиз семьяез но: кузпалыз Надежда Леонидовна, пиналъёсыз Вера но Григорий. Соос кылдытӥзы «Мугур» творческой мастерской. Ёросамы выставка ужаку радъяськизы мастер-классъёс. Мылкыд карисьёс, пиналъёс но арлыдоос, ас киосынызы сюй мунё лэсьтыны дышетскизы. Одӥгезлэн нылпи группалэн занятияз ми но фотокоренымы вуылӥмы. А.П. Степанов лыктэмъёслы мадиз выставкаын возьматэм сюйысь арбериос сярысь, крезьгуро инструментъёсын – шуланэн, пеллянэн, мугуранэн, шальтыртонэн - шудыса лэзиз. Сюйысь шудонъёс этнографияя материалъёс вылэ пыкъяськыса лэсьтӥсько бере, Анатолий Петрович пиналъёсты нырысь ик тодматӥз та удысын кутӥськись кылъёслэн пуштросэнызы. Уго кыл пыр валаны луэ калыклэсь малпаськон ӧрзэ, философизэ. Трос дыр ортчыса но кыл шӧдскымон уг воштӥськы. Ма вал вашкалаосмы понна «шудон»? Со пӧрмемын «шуд» кылысь, озьыен, шудон со – шуд ваись маке. Шудӥсь адями шудо луэ. Тунсыко вал тодыны «мунё» кылэз но. «Му» но «нё» кык инъетъёс пӧрмыто та кылэз. Му – музъем, нё – нёнь (ноны, нонон) шуэмез валэктэ. Удмурт кылын «нёнь-нёнь» кыл но вань, озьы вераса анай нуныезлы нонызэ сётэ. Вашкала сюй шудонъёслэн йыръёссы но киоссы питыралэсэсь – гадьлэн йылыз выллем – лэсьтэмын вал. Таӵе шудонъёс шедьтэмын Сарапул ёросысь вашкала каръёс интыысь. Сюй шудонъёс лэсьтэмын вылэм куинетӥ-тямысэтӥ дауръёсы. Со шедьтэм макеос ик удмурт сюй шудонэз улӟытонлы инъет луизы. Соос вылэ пыкиськыса, туала авторъёс асьсэлэсь выль ужъёссэс кылдыто. Шедьтэм шудонъёс конус выллемесь, ӝуждалазы витё сантиметр пала, пужыосын чеберъямын. Йырлы но киослы укшась вогыриоссы вань. Ӵӧж шудон-шулан лэсьтон борды кутскыса ни, мастер аслаз секретъёсыныз люкиськиз. - Котькуд уж борды сямен ик, татын но ӟеч, бурдъяськем мылкыдын кутсконо, - валэктӥз А.П. Степанов. – Дасям сюез яратыса «сайкатоно», со понна кӧня ке пол киосын кырмано. Чылкыт ужаны тыршоно. Пиналъёс мылысь-кыдысь выризы ваньзэ тае чакланы но ӵӧжъёссэс пӧрмытӥзы. Нош отӥяз Анатолий Петрович котькудӥзлэсь шудонзэ шуланозь вуттӥз. Волшебник сямен векчи бодыен (шипуэн) ӵӧжез быжтӥз бышкалтӥз, пасьёссэ сузялтӥз но...… шултӥз ук! Нокин ӧз малпа вал, али гинэ колӟам ыль горд сюйысь шудон сыӵе зол шултоз шуыса. «Тани тазьы удмуртъёс шултылӥзы ӵукна быдӟым четверге лек, сьӧд кужымъёсты уллян-кышкатон понна», - вераз Анатолий Петрович. Мастер-классэ ветлэм пиналъёс ас киосынызы сюйысь шудон-шулан лэсьтэм сяна, та нуналэ лулпуш дуннезэс но узырмытӥзы. Соос, ӟучомем макеос, шӧдӥзы, анай кылэз тодыны кулэ шуыса. Угось сотэк выжыосмылэсь визьлыксэс, историзэс ӟеч уд вала. Мынам внуке кибашлыен пумиськылэмез бере гуртысен выльысь юалляз на татын кылэм кылъёсты, куд-огзэ ачиз но вунэтымтэ. Ручка но блокнот кутыса, словарьын выллем, кылъёсты ӟуч но удмурт сямен гожъяса кельтӥз. Та ужрад эшшо огпол возьматӥз на, пиналэз пичиысен дышетоно кылмылы. Интерессэ ӝутон понна пӧртэм амалъёсты кутоно. Тани татын но шудон лэсьтон сямен кылъёсын, историенымы тодматон соослы сюлэмазы юн пыӵаз. *** Вакчияк верам потэ на та луло материалэз – сюез – ужаны дасян сярысь. Кызьы вераз А.П. Степанов, шудонъёс лэсьтыны сюй кутоно кирпичлы мынӥсьсэ, ӧжыт луоёзэ. Со небыт но кылзӥськись мед луоз. Гудыса ваем горд сюез шунды шорын яке тӧлогес интыын куасьтоно. Собере тышкаса векчи пыргытоно, жуг-жагезлэсь сузяно. Чылкытатэм сюез ведрае яке тазэ пононо но ву йылтоно, со сюйлэсь ог 5 сантиметрлы вылынгес мед луоз. Кӧня ке нунал ӵоже сое ӧвӧл исано. Дыр ортчемъя сюй таӵ-таӵ пуксёз но ужлы тупамон луоз. Дасям сюез пуйые яке мукет посудае пононо, отчы мултэс омыр медаз шедьы шуыса, умой-умой пытсано. Тазьы кема дыр ӵоже «кисьмаса» улэм сюй ӟечгес луэ.

Л. Кузнецова

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

P1040318.jpg

Вакыт (Приложение на удмуртском языке)