Светлый путь

Поиск по сайту

Адямилыкез ӝутонэн вырон – шудон ӧвӧл
Автор: Administrator   
28.04.2011 06:43

 Удмурт кун университетысь Адямилыкез эскерись институтлэн директорез А.А. Разин но солэн кузпалыз, кылбурчи но кылысь кылэ берыктӥсь Ю.Н. Разина мартэ ёросамы калыкен пумиськонъёсы потазы. Кылсярысь, ужрадъёс ортчизы Кабачигуртын, Факелын, Играын. Берлояз пумиськонэ ёросысь «Удмурт кенеше» пыремъёс вуизы. Альберт Алексеевич люкаськемъёсты ӧтиз традиционной культурамес утёнэ пыриськыны. Угось сое ыштыса калык но бырыны быгатоз. Но нырысь ик А.А. Разин адямилыко луонлэсь пуштроссэ валэктӥз. - Адямилыкезъя удмуртъ-ёслэсь вылӥегес нокин ӝутӥськымтэ. Соос ужез яратӥсесь. Кылсярысь, кӧня дыр но кужым кулэ луылӥз дӥсез адями вылэ вуттон понна гинэ но. Озьы ик чеберез валало. Эскере ай, вашкалаосмылэсь дӥськутсэс! Соос туж чакласа-валаса вуремын. Озьы со дэремъёсын чиедэз но, паськыт мугороез но чебер адско. Оглом, шуо, удмуртъёслэсь 16 пӧртэм дӥськут комплект шедьтэмын. Удмуртъёс чидасесь, лякыт сямоесь. Учке ай, соос вералозы вал: «Эн лекатэ, кенъёс-пиос». Туж гажазы арлыдоосты. Семьяын нырысь интые пуктылӥзы атаез. Нылпи мыдлань ужен вырыку, солы вераллязы: «Атаед ке тодӥз, мар шуоз?» Тазьы верам пайда вае. Нылпиос шоры вӧсь карись кылъёсын ӧвӧл вазьылоно, ултӥяны соосты уг яра. Кузпалъёс но асьсэды лякыт возьыны кулэ. Зэмос удмуртъёс трос тодо кырӟанъёсты, эктонъёсты, калык веранъёсты. Озьы ик юн чаклало сям-йылолъёсты. Та сяна, трос умоез ласянь висъясько. Дышетскемзы луытэк но туж быгатыса нылпиез будэтылӥзы. Мае ке секытэз ӝутон дыръя но мугорзэс тӥятэк визьмынызы ужазы. Трос юанъёс. Валэктон сётыны быгатомы асьмеос гинэ - Жаляса верано, глобализация шуон традиционной культураез куашкатыны, сылмытыны ӧдъя, - азинтэ А.А. Разин. – Одно таӵе югдурлы пумитъяськыны кулэ. Угось асьмелэн азинскон сюресмы меӵак герӟаськемын вашкала культураен. Выжызэ ыштэм калык выжытэм писпулы укша. Ӵуказе нуналмы потэ асьме бордысь. Тросэз нылпиосмы будо выжызэс тодытэк, анай кылзэс валатэк, сямъёссэс чаклатэк. Вашкала дыръя атаен мытэм ужез пиез азинтылӥз. Асьме дыре нош, кылсярысь, атаез кисьтэ ке коркалы фундамент, пиез сое тани ӧвӧл тракторен донганы быгатоз. Чик уз дунъя бубыезлэсь пӧсям вуэныз поттэм ваньбурзэ. Со адями, кудӥз озьы ик уг дунъя пересь муртлэсь ужзэ, уг чакла сям-йылолъёсты, номыр сярысь сюлмаськисьтэм, номырин тунсыкъяськисьтэм луэ. Сыӵе муртъёс ӝог выйыны быгато вина юонэ, наркотикен выронэ, вораськонэ, муго-ренызы вузкаронэ. Соос уг сюлмасько нылпиоссы понна. Озьы кылдо нылпи юртъёс (детдомъёс). Соос уг сюлмасько анай-атайёссы сярысь. Тазьы кылдо пересь муртъёслы интернатъёс. Соослэн пушказы уг кузёяськы мар ке выльзэ кылдытон сярысь малпан. Солы тунсыко потэ кылдытэмзэ куашкатон, быдтон, пазьгон гинэ. Таӵе муртъёслы инкуазьлэн ӵуказе нуналыз но нокыӵе ӧвӧл: пушъёз-а со яке кырсь пӧлы ӵакмоз? Али кызьыгес ортчо сюанъёс? Одно та ужрадъёсы лыкто кӧня ке медъям адямиос, кудъёсыз шулдырто люкаськемъёсты. Озьы ӵемысь сюанчиос люкисько кыклы: палэнысь лыктэм кырӟась-верасьёслы но учкисьёслы. Выль арез пумитан но таӵегес ик пӧрмыса кошке. Азьло дыре татчы котькуд лыктӥсь мурт нимысьтыз дасяськылӥз: малпаськылӥз, кыӵегес дӥсь дасяны, кинлы пӧрмытскыны. Малы меда берло дыре ум быгатӥське шулдыръяськыны вина юытэк? Малы меда калык кырӟанэз мурт шӧмъем эстрадая крезьгур воштыны кутскиз? К.Д. Ушинский гожъяз: «Мурт кырӟанъёсты кырӟась калык - висись калык». Возьдаськиськомы, шуо - Малы куд-ог удмуртъёс возьдасько асьсэ выжызылэсь? Малы соос уг верасько анай кылынызы? – кисьтэ но кисьтэ А.А. Разин. – Валэкто. Сыӵе муртъёс уг тодо асьсэ выжызылэсь историзэ. Уг тодо вашкала удмурт цивилизация сярысь. Нош со сярысь гожъяло историкъёс Геродот но А. Рамбо, археолог М.Г. Худяков, озьы ик К. Герд, М. Гришкина, Г. Зданович но мукет тодосчиос. Тросэз удмуртъёс уг тодо, вашкала выжыосмы ыргон ӵыжатӥзы, пӧртэм арбериос дуризы вал шуыса. Вузкаризы Китаен, Индиен, Египетэн, Италиен но мукетъёсыныз. Туж ӧжытэзлы тодмо, праудмуртъёс кылдытӥзы но огазеязы уно городъёсты. Вӧзамы улӥсьёс асьмемыз юромо ултӥян вылысь пӧртэм урод веранъёс вӧлмыто. Удмуртъёслэн, пе, номырзы ӧвӧл: культуразы но, кылзы но, историзы но – пӧрмостэм калык. Но озьы со чик ӧвӧл. Кыӵе ке калыкез ултӥяса верась мурт нырысь ик ассэ ултӥя. Со уг дунъя нырысь ик аслэсьтыз традиционной культуразэ, озьы ик вӧзысьтыз калыклэсь но. Сыӵеослэсь верамъёссэс пеле ӧй вал пононо. Угось вӧзысьтыд муртэдлэн мадемъёсызлы оскыны кутскид ке, зэм но астэ «кыкетӥ сортъемъёс» пӧлы пыртыны ӧдъялод. Ачид валаса ик уд вутты, мар лэсьтэмдэ. Тросэз кыӵе ке зол кужым улэ пачка но соослэн кутэм законъёсынызы улыны кутске, мукетыз ляб, пересь муртъёсты, пиналъёсты вӧсь карыны ӧдъя. Огкылын вераса, бекчее тырем комакъёс выллемесь луо но куспазы йырйисько. Но асьмелэн таӵеесь ӧвӧл луоно. Огъя кариськоно. Вӧлмытоно удмуртъёслэсь традиционной культуразэс, пыӵатоно сое котькуд удмурт семьяе. Еврейёс, бигеръёс но китайёс азьлане йыгмыт вамышъяло вашкала культуразэс утеменызы. *** Альберт Алексеевичлэн верамъёсыз шонересь, куд-огез ласянь споръяськоно ке но. Котькудмылы адямилыко луыны тыршоно. Адямилыкез ӝутонэн вырон – шудон ӧвӧл. Та сярысь бускельёстылы, эшъёстылы, тодмоостылы вераны эн вунэтэ. Оло мылкыдъёстэс, малпанъёстэс кисьтэмды потоз газет пыр но. Жингыртэ, вералэ, гожтэ!

Н. Данилова

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

P1040318.jpg

Вакыт (Приложение на удмуртском языке)