Светлый путь

Поиск по сайту

Улон дауръёс
Автор: Administrator   
14.02.2017 09:36

«Из но, му но пилиське но…» Кылем арын Герейгуртысь Мария Архиповна Лекомцевалы 90 арес тырмиз. Собыдња аресаз љожтћськыса улћз синмыз ляб адњонлы. Нылпиосыз эмчиос дортћ нуллћзы. Озьы Мария Антоновна адњыны кутскиз. Шумпотыса газет лыдњыны ќдъяз. Гожъяськыны мылкыдыз но кылдћз. Кабачигурт библиотекаын «Ибырвесь» кружокез нуись В.Н. Чирковалы пересь муртлэн гожтэмъёсыз вуизы. Отын со улэм-вылэмзэс тупен-тупен мадем. Вера Никифоровна џапак ож вылтћ 65 гуртооссылэн улэм-вылэмъёссы сярысь альбом дасяз ни вал. Мария Архиповналэн ужез џапак татчы тупамон. Библиотекае вуэм муртъёслы пересь нылкышнолэн гожтэмез тунсыко потэ. Тетрадь киысь кие ветлэ. «Гожтэмез лыдњыса, тодэ лыкто мамаелэн мадемъёсыз. Пумен синкылиос кылдо. Кыџе курадњизы уго», – маде В.Н. Чиркова. Мария Архиповналэсь гожъямъёссэ печатлан сярысь сюлмаськиз Вера Никифоровна. Мон, Мария Архиповна Лекомцева, вордскемын Герейгуртын 1926 арын 25 июле. Будћ мумин-бубин, умой улћ.

 

 

Нырысетћ классэ мынћ Герей школае, отын 3 классэз йылпумъяй. Собере тятямес Архип Иванович Широбоковез ыстћзы Сеп школае дышетыны. Со начальной классъёсты дышетћз. Озьы семьямы выжиз улыны Сепе. Кык ар ортчыса, ми берен берытскимы Герее. 1939 арын семьяямы бадњым кайгу пыриз: мамамы Ксения Михайловна куать нылпиосын огназ кылиз. Самой бадњымезлы Александралы (ми сое Сашук шуиськом вал) 15 арес гинэ вал ай, нош пичиезлы Рудольфлы – куать толэзь. Мыным соку 13 арес тырмиз. Мамалэн кут но кутано, колхозэ ужаны но потоно, пиналъёс но пичиесь. Мамамес жаляса, дышетскемысь дугдыны малпай, ужало, пќй. Со ќз лэзьы. Куатетћ классэ трос кузя Эграла ветлћм. Џукна 6 часэ потћськом гуртысь, љытазе 3 часэ гуртэ вуиськом. Ветлћм, конешно, пыдын. Љыт нош пу вандоно на вал гур эстыны (азьвыл, али сямен, пу ќз дасяллялэ вандыса-пильылыса, нуналлы быдэ вандоно луэ вал киын), ошмесысь ву ворттоно карнанэн. Урокъёслы дасяськыны дыр уг ни кыльы. Гужем колхозын ужай: эшъёсын џош уриськиськом, мажтаськиськом. Етћн ишкон дыр вуиз, сое киын ишкиськом, культое керттылћськом, пуктылћськом. Љытазе бригадир лыдъя, кин кќня культо керттћз, со вылысь дун тыро. Басма понна Гужем ортчиз. 7-тћ классэ мынон дыр вуиз. Эшъёсы школае ветлэмысь дугдћзы. Мон но уг ни мынћськы. Мама нош ыстэ. Куинь толэзь дышетски. Тятялэн сузэрезлэн нылъёсыз Устье-Люкысь лыктћзы. Соос монэ љутказы сьќразы мыныны: мамазы, тятязы пекарняе ужаны кутскиллям, отчы утялскись, пе, кулэ. Леспромхозын ужасьёслы басма но сётъяло, уждун но коньдонэн, пе, тырозы. Пекарня леспромхозлэн вал. Мама ужын дыръя, мон пегњыса кошки соос сьќры. Мынам сокем-сокем басма басьтэме потэ вал! Кыџе тыршыса мон ужай отын: пу пыртылћсько, ву вайылћсько, пол миськисько, нянь пыжон формаосты вќйын зырасько. Куинь арня ужай, маке дћсен лыктћ, соин ик улћ, соин ик ужай, воштон дћсь ќй вайы. Одћг пол но ќй пыласькы, пекарняын ик мешокъёс вылын кќлай. Џыжы-выжыосы улћзы пекарня бордысь притыкын. Отын пичи укноез вал. Одћг пол отћ адњисько: двоюродной сузэръёсы басма котырын выро, таиз мыным, таиз тыныд шуыса люко-басьто. Мон но шумпотыса витисько ни сётозы шуыса, юаны уг дћсьтћськы. Одћг-ог нунал ортчыса, дћсьтыса но дћсьтытэк юасько, мыным басма сётћзы-а шуыса. Тон, пе, пичи на, паспортэд ќвќл, соин ик басма но ќвќл. Быдэс уйез бќрдћ, сыџе љож вал. Џукна нянь пыжисьёслы шуисько, гуртэ, пќй, бертыло, мунчое но пыро, дћсьме но вошто. Мыным одћг буханка нянь сётћзы но келязы. Берытскон Бертоно сикетћ. Кќшкемасько, бќрдыса вамышъясько. Бќрсям валэн коџовкаен кык кузя пиос вуизы. Дугдћзы но юало, кытчы мынћсько шуыса. Герейгуртэ шуисько. Я соос монэ Шоргуртозь вуттћзы. Табере, пе, гурттэ шедьтод-а ни? Шедьто, шуисько, тау карыса. Мыным соку 14 арес вал. Вуи Гереям. Корка пырыны уг дћсьтћськы: мон ведь пегњыса кошки, коньдон но, басма но уг вайиськы. Кызьы учком мама шоры? Ма со шуоз? Нош мама монэ лћятћз: ма со понна бќрдод, пе, џуказе школае мынод. Кызьы школае мыном на, сомында кельтћ ни урокъёсты. Ачим келяло, шуиз, верасько дышетћсьёсын – солэн сокем монэ дышетэмез потэ вал. Нош мон ужано кариськи ни: мамаен кык кузя ужаса, нянь но тросгес басьтомы. Сюлмысь колхоз уже потасько: складэ сортировать карыны мынћсько, кутсаськыны ветлћсько. Ужысь бертыса, пу вандћсько, љытазе черсћсько, носки-пќзь керттћсько. Тол ортчиз, тулыс вуиз. Колхозын гырыны-кизьыны дасясько. Монэ но усыяны гожтћзы. Та дырозь валэн ноку ќй ужалля. Соослэсь кышкасько но, адямиез курчыны выро кадь потэ. Вал сюдћсь, валэлэн йыраз сермет поныса, монэ пудо-животэз маялляны но жаляны косћз. Валэд, пе, соку астэ но ярато, кылзћськоз. Озьы дышетски валэн ужаны, усыяны но дыши. Шќдтэк шорысь гуртысь пиосты кыџе ке лагере дышетыны басьтыны кутскизы. Кышноос кышканы ќдъязы, война кутскоз, шуо. Мон уг валаськы, малы кышкало. Но пиосты оген-кыкен нуыса, колхозын секыт ужъёс пумен кышноос но пиналъёс вылэ выжизы ни. Монэ но гырыны косо. Валме воштћзы. Гырыны мынћ, герые шонаське, уг вормиськы. Зол-зол кариськи, озьы ик каллен дыши гырыны. Гырон-кизён быриз, турнан дыр вуиз. Монэ но турнаны ыстћзы. Литовкаме шуккыны уг быгатћськы, ныж литовкаен турнаны но уг пќрмытћськы. Мажтаськыны ветлћ. Аран дыр вуыса, араны потћм сюрлоен. Соку трактор-машина ќй вал. Кутсаським валэн бергатыса, сортировать карим киын бергатыса. Кќня араськом, со кутсаса уг быры – люкаськом кабан, сое, толалтэ валэн ворттыса, кутсаськом обиньын. Пулы – салазкиен сике Гужем орчиз. Сћзьыл вуиз. Пиос войнаысь ќз бертэ. Егитъёсты, кышноосты сике ысто ни. Факел завод пуэн ужаз, сое война вылтћ но ќз пытсалэ. Сћзьыл мыныса, толбыт пу вандћськомы, валэн ворттћськом. Уг ке окмы, гужем но ысто сике. Милесьтым мамаез но ысто ни. Милям не пумы ќвќл, не скал сюдыны куромы ќвќл. Дћнямы пыризы бригадир, сельсоветлэн предэз Матвей Кононович Брызгалов но колхозлэн предэз Мария Павловна Широбокова. Мама котомкае картошка, кубиста понћз но кошкиз. Ми бќрдыса кылимы. Куинь кираж гинэ пумы вал на. Куазь туж кезьыт улэ. Мама кошкыкуз алыса кельтћз: гулбечысь картошкаез кынтыны эн шедьтэ, лекос ёрмиды ке пулы, заборез но сутэ ни. Ма кызьы бќрысь кенераськом? 17 аресъем бадњымзэ сузэрмес Сашукез Иже военной заводэ басьтћзы. Ми вить кузя пиналъёс гуртэ кылемын. Мыным 15 арес ни. Огезлы вынылы Иванлы – 12, мукетызлы Васялы – 9 арес. Вынъёсыным сике мынћм. Лымы туж трос. Векчи кызъёсты гинэ вандћм. Пиос салазкиен ваизы, мон – пельпум вылам. Џуказеяз нош мынћм. Векчиосыз, милем погыртоно кадьёсыз, писпуос уг но шедё ни. Ярам, валёжник шедьтћм но сое вандыса нош вайим. Салазкиен ваем маке кемалы-а бен тырмоз? Забормес вандыны кутским. Бускель кышномы Александра Семёновна Чуракова (гуртамы сое Кырсан Тупал шуо вал) џектћз џош сике мыныса пу кораны быдэн вал воз соослы но милем. Вынъёсы џуказеяз школае мынћзы, ми Александра Семёновнаен – пу кораны. Сикысь бертћсько но, пичиосыз Лидя но Рудик бќрдо, кќтсы сюмамен. Љогак пичи гур эстћ, сиён пуктћ. Пумен соос пичи гур вылын картошка пыжыса сиизы но кќлыны выдћзы. Мон сиён пќзьтћ, скалэз сюдћ-люктай. Џуказеяз дышетскись вынъёсы школаысь вуизы. Сиськемзы бере пу вандћзы. Љытазе, валъёс колхоз ужысь ваньмем бере, вынъёсыным пумес быдэн бадњым воз вайимы. Кыџе шумпотћмы быгатэммылы: табере ум ни кынме! Кенермы но интыяз кылиз. Љоген мама но, оло, бертоз ини сикысь. Та шумпотонмы бере куинь нунал ортчыса, мамамы бертћз. Бер љыт вуиз. Нырысь ик гидысь скалэз эскерем (скалмы кунян ваёно вал), пумес но учкем. Туж шумпотћз улыны быгатэммылы. Нош ик сике ыстозы на, пе. Мон кышкасько гуртэ кыльыны: кунян ваемез адњеме ќвќл на, сое быгатоно утялтыны. Скал кыскыны бен быгатћсько ни. Џуказеяз џукна ик бригадир вуиз ни мамаез сике ыстыны. Мон куриськи мама интые. Мынћм Анна Григорьевнаен џош. Ужаськом куинь кузя нылъёс, кык кузя пересь пиосмуртъёс. Алексей Лекомцев, монэ жаляса, малы татчы лыктћд, шуэ, жадёд ук, пе, лумбыт ужаса. Озьы ик ужай калык радъя, жади ке но, ќй љожтћськылы. Озьы луиз сике пыреме. Толалтэ сикын ужаськом, тулыс вуэ ке, гыриськом-кизиськом. Со быдња бусыосты валэн гырыса, пинал пиос кизё. Соос бордын Матрёна Ильинична Лекомцева кизе, кытћ дышетэ, эскере но, вылды. Кизьыны но ведь капчи ќй вал: чыртые ошемын кизён куды 15-20 кг юэн.

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

218.jpg

Вакыт (Приложение на удмуртском языке)