Светлый путь

Поиск по сайту

Удмуртъёслэн югдытӥсьсы
Автор: Administrator   
10.03.2011 07:33

Котькуд калыклэн аслаз батырез вал, со улонзэ, кужымзэ сётӥз калыксэ огазеян, ӝутон понна. Асьмелэн одӥгез сыӵе пимы – Трокай Борисов. Трофим Кузьмич бадӟым инты басьтэ калыкмылэн но кунмылэн улоназы, со трос лэсьтӥз Удмурт автономной областез кылдытон, наукаез, литератураез азинтон понна. Асьмеос сое тодыны но котьку тодамы возьыны кулэ.

Удмурт калыклэн дано пиезлы вордскемез дырысен туэ 120 ар тырме. 2011 ар шаерамы ялэмын Трокай Борисовлэн ареныз. Юбилеен валче трос ужрадъёс чакламын.

Удмурт публицист но учёной-филолог Трофим Кузьмич Борисов вордскиз 1891 арын 19 ноябре Алнаш ёросысь Кизекгуртын, середняклэн семьяяз. Дышетскиз земской школаын, Алнашысь кык классъем училищеын но Елабугаысь городской училищеын. Берлояз вузкарись фирмаын рассыльной луыса тыршиз но фирма ыстыса кык ар дышетскиз Казаньысь технической училищеын. Гимназилэсь экзаменъёссэ экстерн амалэн сётыса, 1912 арын дышетскыны пыриз Петербургысь университетлэн историко-филологической факультетаз. Пыриськылӥз студентъёслэн революционной кружокъёсазы. 1913 арын выжиз Москваысь медицинской факультетэ, собере – Казаньысь университетэ. Татысен но пыриськылӥз студентъёслэн лушкем кружокъёсазы, тодматскиз удмурт интеллигенциен.

1916 арын тулыс врач-венеролог Т.К. Борисов келямын вал фронтэ, ужаз полевой госпитальын. 1917 арын июле пыриз большевикъёслэн партиязы. Октябрь революциез пумитаз Минск котырын. Смоленщинаын Совето власть кылдытонэ пыриськиз. Сое татын бырйылӥзы рабочийёслэн но солдатъёслэн горсоветазы депутатэ.

1918 арын Т.К. Борисов Украинаын ожмаськиз гайдамакъёслы пумит, собере Прикамьеын – белочехъёслы но дутовецъёслы пумит. Восточной фронтлэн 2-тӥ армиезлэн политотделэз сое келя Елабугае Совето власть но удмурт кылын газет поттонэз радъяны. Советъёслэн съездзы Трофим Кузьмичез Елабугалэн уисполкомезлы тӧрое быръе, берло – ревкомлы тӧрое.

1918 арын 31 октябре Елабугаын потэ «Гудыри» газетлэн нырысетӥ номерез. Солэн редакторез луэ Т.К. Борисов. Удмурт шаерамы Колчаклэсь войскооссэ пазьгем бере, Трофим Кузьмич кичӧлтэм улсын Сарапулын вань удмуртъёслэн рабоче-крестьянской съездзы ортчиз. Отын Наркомнац ласянь сое удмуртъёслэн ужъёссыя комиссаре бырйизы. 1920 арын Сарапулын кылдытӥз удмуртъёслэн ужъёссыя комиссариат. Соку ик кичӧлтӥз коммунистъёслэсь-удмуртъёслэсь всеудмуртской конференцизэс люканы. Татын решение кутэмын вал автономной область кылдытоно шуыса. Вотской обком кылдытозь Трокай Борисов И.А. Наговицынэн, П.А. Стрелковен, Г.А. Трефиловен но Г.Н. Гусевен артэ пыриз РКП(б)-лэн ЦК-лэн Удмурт бюрояз. Облревкомлэн тӧроезлэн кивоштӥсез луэм сяна, кивалтӥз облоноен. 1922 арысен со – областной земельной управленилэн кивалтӥсез.

1923-1925 аръёсы Т.К. Борисов ужа Калмыкиын обкомлэн секретарез луыса. И.А. Наговицынэз Москвае выжтэмен, Трофим Кузьмичез нош ик Удмуртие ӧтизы но Удмурт облисполкомлы председателе бырйизы. 1927 арысен кивалтӥз Коми автономной областьлэн облздравотделэныз. Собере аспирантурае пыриз Москваысь Бреннер нимо институтэ. Со бере аръёсы Трокай ужа Подмосковьеын. 1933 арын 14 январе сое арестовать каро но «Гердлэн ужезъя» судить каро. Пуке Иркутскысь централын, 1936 арысен пытсэт сьӧрын улэ Алма-Атаын, 1938 арысен – Кустанайын. 1940 арын выльысь суд улэ кыско но Малгобекысь свинец поттон рудникын ужато. Трокай Борисов 1943 арын 4 июне Чимкентын кулэ. Солэсь сайкыт нимзэ берыкто 1988 арын гинэ.

***

Т.К. Борисов университетын дышетскыкуз ик люканы кутскиз удмурт словарь. Нош «Гудыри» газетын редакторын ужакуз мылысь-кыдысь басьтӥськиз литературной уж борды. Вить ар пала - 1918-1923 аръёсы - газетлэн котькуд номерез усьтӥськылӥз ӟырдыт публицистлэн вазиськон статьяеныз. Со кылбуръёс, листовкаос гожъялляз, удмурт кыллэн лымшор но уйпал вераськонъёсызъя удмурт кылын нырысетӥ антология люказ.

Номырин мертантэм юрттэтэз Т.К. Борисовлэн литературной движениын. Кузёбай Гердэн ӵош «Гудыри» газетын литературной студия усьтӥз. Нош 1921 арын Ижевскын кивалтӥз удмурт писательёслэсь нырысетӥ съездзэс ортчытонэн. Озьы ик кичӧлтӥсез вал революционной писательёслэсь всеудмуртской ассоциацизэс кылдытонын.

Дасяз Л. Кузнецова

 

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

P1030115.jpg

Вакыт (Приложение на удмуртском языке)