Светлый путь

Поиск по сайту

Вамышен-вамышен азьлань
Автор: Administrator   
10.03.2011 07:18

Гуртъёсы ветлыку отысь пӧртэм мылкыдэн бертӥське. Ужъёссы урод мыныку, милям но сюлэммы интыяз уг луы, югдур ӟеч ке, капчияк шокчиськом. Умой мылкыдын берытскимы Мужбер палъёсы январьлэн пумаз вуылыкумы. Татын вамыш бӧрсьы вамыш лэсьто хозяйствоязы улон-вылонзэс умоятон вылысь. Вить ар талэсь азьло сюлэсь ятыр ужасьёс колхозысь кошкемен (солы мугъёс вал), чидантэм югдур кылдылӥз. Табере улон каллен воштӥське. 2008-тӥ арысен тырмо ни механизаторъёс, дояркаос, специалистъёс. Гуртоос пӧлын уже лыктыны эшшо мылкыд карисьёс вань.

Хозяйствоын умойлань воштӥськонъёс ас понназы ӧз лыктэ, инмысь ӧз усе. Нырысь ик, ужасьёс толэзьлы быдэ уждун басьяны кутскизы. Валазы, выль кузёзы А.В. Пчеловодов кылем ваньбурзэс капыръян вылысь ӧвӧл лыктэмын. Со сюлмаське гуртоослэсь улонзэс умоятон, хозяйствозэс пыд вылаз йыг-йыг султытон сярысь. Нош ужась адями шӧдэ ке ас сярысьтыз сюлмаськемез, ачиз но лулысь-сюлмысь ужаны тырше. Озьы гуртлэсь палэнэ ужаны кошкемъёс но куд-огез берытскизы дышем удысазы.

- Йӧллы дунъёсты ӝутӥзы, со но шӧдскытэк ӧз кыльы улон-вылонамы, - шуэ «Мужбер» ООО-лэн тӧроез Андрей Владимирович. – Умоятыны быгатӥмы ужан условиосты. Кылем арын ваньзэ скал фермаосты выльдӥм-тупатъям, Сосновские Шорниын кирпичысь выль кунян гид пуктӥмы. Малпанъёс вань Чумойын но выльзэ ӝутыны. Коньдон потэ йӧл вылысь, озьыен скалъёслэсь лыдзэс йылэтоно. Али фермаосамы интымы ӧвӧл. Выль скал гидъёс кулэ.

- Ужатозямы котькыӵе кузёосты адӟиськиз ни, но А.В. Пчеловодовлы, уж борды сюлмысь басьтӥськемезъя, ми оскимы. Аръёс ортчемъя адӟиськомы ни, ӧвӧл пӧяськиськеммы, - вера татысь главной бухгалтер Е.В. Шкляева. – Андрей Владимирович быгатӥз ужасьёсты огазеяны, котыраз биньыны, дисциплинаез кияз кутыны. Играын ке но улэ, югдурез ялан син азяз возе, ӝыт кысконэ но вуттӥське, сторожъёсты но эскере, ваньмыз понна сюлмаське.

Специалистъёсын-а, огшоры ужасьёсын-а вераськиськод, ваньмыз шумпото ужъёссылэн азьланьскемезлы. Соос нимысьтыз пусйыса верало арлы йылпумъянъёсъя бадӟым саклык висъямзылы. Кин ке пусъемын коньдон премиен, кин ке дуно кузьымен. Кысык ужгуръёс мыныку но чупырскисьёссэ ас вакытаз дунъяло.

Ужасьёслэн тыршемзы син азьын: 2010 арын «Мужбер» ООО-ын скаллы быдэ 4231 килограмм йӧл кыскизы, нимаз дояркаос эшшо но тросгес. Скаллэн йӧлыз кыл йылаз но утялтэм бордын. «Кылем гужемлэсь кӧс но пӧсь улэмзэ ми юн шӧдӥмы ке но, пудо сиён асьмелы тырмымон дасямы, фуражмы узгес окмы, дыр. Андрей Владимирович коньдонэз уг жаля пудо сиёнэз пӧртэмлыко карыны, - ужъёсынызы тодматонзэ азьланьтэ Елена Витальевна. - Басьтӥськомы витаминъёс, сима кыӵ (жмых), патока, канфет поттонлэсь кылем-мылемъёссэ. Берлояз шоколадэз но, орехиез но шедьылэ. Пӧсь вуэн небӟытӥськомы но сиён вылтӥ кисьтӥськомы».

Мужберъёс ужазы вань луонлыкъёсты кутыны тыршо. Тани фермаосты тупатъянын-лэсьтонын но государстволэсь уже интыянъя центр пыр юрттэт сётонзэ валаса кутӥзы но асьсэ ужасьёссылэн кужыменызы ик вань лэсьтӥськонэз быдэстӥзы.

Ёросмылэн одӥгаз кыдёкысь хозяйствояз улон выльысь улӟемлы юн шумпотоно. Инмар мед утёз соосты, ужъёссы, уждунзы отӥяз но гурезь выллань мед тубозы.

Л. Кузнецова

Фотоез А. Караваевлэн

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

157.jpg

Вакыт (Приложение на удмуртском языке)