Светлый путь

Поиск по сайту

Егитъёслы оскон юнма
Автор: Administrator   
10.03.2011 07:01

Быдэс дуннеын 21 феврале пусъё анай кыллэсь нуналзэ. Асьме понна дуно удмурт кылмы. Та нуналлы сӥзьыса ик ёрос библиотекалэн литературной гостинояз кылем пятницае чузъяськизы шулдыр удмурт гуръёс. Сепысь егитъёс Алексей Тронин, Светлана Корепанова но Андрей Лекомцев учкисьёсты кылмылэн чеберез сярысь выльысь малпаськытӥзы кырӟанъёссы пыр.

Сепысь культура юртын алигес ужаны кутскем егит пияш Алексей Тронин пумен басьтӥськем кырӟанъёс кылдытъяны. Удмурт кылбурчиослэн кылъёссыя (ачизъя кӧня ке соосты тупатъя на) витё кырӟанъёсыз люкаськиллям ни. Егит мурт реп но дасям. Та ӝытэ люкаськемъёс сое нырысьсэ кылзӥсьёс луизы. Кызьы валэктӥз Алексей Валентинович, удмурт кыл реплы уггес тупа, асьмелэн уго кылъёсмы жильыртӥсесь. Но мыным соослэн Светлана Корепановаен ӵошен быдэстэмзы кельшиз. Малпасько, егитъёслы но сюлмазы лякиськоз. Удмурт кылмес котькыӵе амалэн азинтоно ук.

А.В. Тронин сеп палъёсы юнме шорысь ӧз шедьы. Ваньмы тодӥськомы, ёросамы Сеп удмурт кылэз утёнъя одӥгез азьветлӥсез луэ. Сепъёс Алексеез Дэбесысеныз синйылтыса, крезьгуръя колледжын дышетскыкуз практиказэ ортчыны доразы ӧтиллям. Озьы кыдёке азьпала учкиллям. Алексей воксёзэ татчы кылиз, татысь ик шудзэ шедьтӥз.

Усто кырӟась, пӧртэм инструментъёсын шудӥсь пияш нырысетӥ нуналъёсысен ик гуртысь егитъёсты бордаз биниз. Кружоказ гитараен шудыны ветло. Кин тодэ, шораз учкыса, пумен кырӟан гожъян борды басьтӥськисьёс но шедёзы. Алексей Валентинович шуэ, вань лул-сюлэмы, пе, клубын, отчы шутэтскыны кадь ветлӥсько. Сюлэмъя ужез ик творчествое но кыске, луоз.

Жингрес, чебер куараеныз шумпоттӥз С.М. Корепанова. Удмурт но ӟуч кырӟанъёс уӵылэн чирдэмез кадь вӧлскизы залэтӥ. Нош крезен «Ширъянэз» шудыкуз ваньмыз шоканзэс ик пытсаса кылзӥзы. «Кыӵе шуныт, чебер, небыт куараез крезьлэн», - шыпытак кылӥськиз учкисьёс пӧлын.

Светлана Михайловна сцена вылын кырӟа пиналысен. Быгатэмез трос пӧртэм дипломъёсын, лауреат нимъёсын пусйылэмын.

Кичабонзэс учкисьёс ӧз жалялэ муспотон егит пияшлы Андрей Лекомцевлы но. Фонограммая кырӟаса но, гитараен но (сое дышетӥз ни Алексей) быгатэмзэ возьматӥз.

Та егитъёс шоры учкыса, анай кылмылэн азинтӥськемезлы оскон уката юнма. Чебер удмурт кырӟанъёс, вужъёсыз но выль вордӥськисьёсыз, калыкмылы сётыны ӧвӧл кулэ анай кылмес вунэтыны, солэсь палэнскыны.

Татысен ик интыысь тодмо кылбурчимы Ольга Русских Алексей Тронинлы кузьмаз кылбуръёсыныз бичетсэ. Ольга Арсентьевналэн кылъёсызъя гожтэм кырӟанъёслэн нош вылез авторзы кылдоз, малпасько. Солэсь «Арганчизэ» пумен татын ик Алексеен Светлана кырӟаса лэзизы ни.

Ужрадэ лыктэм Играын улӥсь Г.Н. Лекомцева сеп палъёсыныз данъяськыса вераз: «Сеп музъем котьку таланто адямиосын узыр вал. Тау тӥлед, туж шумпотыса кылзӥмы». Алексей Тронинлы вольыт но кузь творческой сюрес сӥзиз та ужрадэз нуись библиотекарь О.А. Степанова. Сыӵе мылкыдын ик пукиз котькудӥз учкись. Егитъёслы вань осконмы.

 

Л. Кузнецова

Фотоез А. Караваевлэн

Комментарии
Добавить новый Поиск
Оставить комментарий
Имя:
Email:
 
Тема:
 
:angry::0:confused::cheer:B):evil::silly::dry::lol::kiss::D:pinch:
:(:shock::X:side::):P:unsure::woohoo::huh::whistle:;):s
:!::?::idea::arrow:
 

3.26 Copyright (C) 2008 Compojoom.com / Copyright (C) 2007 Alain Georgette / Copyright (C) 2006 Frantisek Hliva. All rights reserved."

 
 

Случайное изображение

P1050450.jpg

Вакыт (Приложение на удмуртском языке)